Anggara, 25 Februari 2025 kelaksanayang Pamungkah Bulan Bahasa Bali ring SMA Negeri 2 Amlapura. Bulan Bahasa Bali inggih punika silih tunggil program prioritas Pemerintah Provinsi (Pemprov) Bali sajeroning utsaha ngalestariang, nglimbakang, miwah nincapang Basa, Aksara, miwah Sastra Bali. Indike puniki nyinahang yening Pemprov Bali banget urati ring utsaha ngajegang miwah nglimbakang Basa, Aksara, miwah Sastra Bali. Parikrama Bulan Bahasa Bali puniki kemargiang ring Sasih Februari 2025, majantenan antuk kamargiang "Awulan Mabasa Bali" ring wawidangan SMAN 2 Amlapura utamanipun ring para guru lan sisia SMA Negeri 2 Amlapura sami.

Ring acara pamungkah puniki sisia SMA Negeri 2 Amlapura, Ni Wayan Anggita Putri (XII.2) lan Ni Luh Ade Pertama Dewi (XII.8 ) ngelanturang Wirama Swandewi lan Wirama Rajani Manda Malon. Ida Bagus Putu Aditya Mahendra (XI.3) lan I Gusti Ngurah Bimasena Dipratama (XI.1) ngelanturang Palawakyanya Bhagawan Domia. Suksman Plawakya punika para sisia mangda bhakti sareng nabenyane. Pamungkah Bulan Bahasa Bali puniki kasengguh antuk pemukul gong kantos ping tiga olih Bapak I Wayan Puja Astawa S.Pd., M.Pd. 

Acara "Awulan Mebasa Bali" puniki pinaka implementasi Visi Nangun Sat Kerthi Loka Bali sane kaambil saking Pola Pembangunan Semesta Berencana menuju Bali Era Baru, sane madaging arti ngalestariang kasucian lan keharmonisan Alam Bali lan Dagingnyane, mangda prasida ngamolihang kahuripan Krama Bali sane sejahtera lan bagia. 

Bulan Basa Bali warsa mangkin sampun nganjek sane kaping 7 taler ngambil sesanti Jagat Kerthi - Jagra Hita Samasta sane kasukmaning pemuliaan bahasa, aksara lan sastra Bali. SMA Negeri 2 Amlapura ngemargiang wimbakara-wimbakara sane pemiletnyane panyeledi saking sisia kelas X miwah XI. Wimbakara sane kemargiang inggih punika:

1. Utsawa Nyurat Aksara Bali

2. Wimbakara Busana Adat Bali

3. Wimbakara Ngwacen Puisi Bali Anyar

4. Wimbakara Gending Pop Bali

Para sisia SMA Negeri 2 Amlapura seneng lan egar manah ngamiletin wimbakara bulan bahasa Bali puniki. Pinaka warga Bali, sampun marupa swadharma iraga sareng sami ngawerdiang seni lan budaya Bali.